<<Gabon Gazte programa berezia, abenduaren 26tik urtarrilaren 4ra, Basauriko Gazteguneetan>>

Gabon hauetan Basozelaiko eta San Migeleko Gazteguneetan, Gabon Gazte programaren barruko jarduerak egingo ditugu, abenduaren 26tik urtarrilaren 4ra, 11:00etatik 13:00etara, eta 12-15 urte bitarteko gazteei zuzenduta. Tailerretan izena emateko, hona hemen hiru aukerak:

  • Lehenengo astea: abenduaren 26tik 28ra. Prezioa: 5€
  • Bigarren astea: urtarrilaren 2tik 4ra. Prezioa: 5€
  • Bi asteak: abenduaren 26tik urtarrilaren 4ra. Prezioa: 10€

Ondoren, jardueren laburpen laburra:

  • Serigrafia ispiluetan: Gabonetako mezuak edo irudiak ispiluetan grabatzeko aukera izango dute.
  • Irteera GHPra: Gabon Haur-parkean primerako egun pasa, BECen.
  • Ostadar tarta: Gabonak eztitzeko, koloretako tartarik goxoena egingo dugu.
  • Trufak: Gabonetako betiko postre hau egiten ikasiko dugu.
  • Errealitate birtuala: gazteak jolas birtualaren barruan sartuko dira.
  • Elur poteak: elurra etxera ekartzeko modurik errazena erakutsiko dizuegu.

<<Irteera UGP/PIN-era abenduaren 27an, ZirtZart Basauriren eskutik>>

Gabonak gertu ditugu, eta aurten ere, Zirt Zart Basauri Gazteria zerbitzuak Kultur Basaurirekin elkarlanean irteera bat antolatu du UGPra (BECen) abenduaren 27an, 12 eta 17 urteen arteko gazteentzat. Joan-etorria metroz egingo dugu. Ordutegien aldetik, San Migeleko gazteek goizeko 10:00etan hartuko dute autobusa/lanzadera, BBK aurreko autobus geltokian Basaurira joateko. Buelta toki berean izango da arratsaldeko 17:00etan. Basauriko gazteak, goizeko 10:10ean Basauriko udaletxearen aurreko autobus geltokian egon beharko dira. Kasu honetan, buelta arratsaldeko 16:50ean izango da, abiatze leku berean.

Jarduera honetarako, bakoitzak bere janaria eraman beharko du (tupper, ogitartekoa…). Komenigarria izango da arropa/-oinetako erosoak eta BARIK metroko txartela eramatea.

Plazak mugatuak dira, eta apuntatzeko azken eguna abenduaren 5a izango da.

<<Basauriko Gazteguneetan azaroan eskainiko den programa>>

Zirt Zart Basauri Gazteria zerbitzutik, hil honetan, “COLOMBIA”rekin lotutako doako zenbait jarduera eskainiko diegu 12-17 urte bitarteko gazteei. Tailerrak Basozelaiko eta San Migeleko gazteguneetan izango dira. Ez da beharrezkoa izena aurretiaz ematea, baina toki kopurua mugatua izango da. Izena eman ahala sortuko dira taldeak. Jarraian, gure egitarauaren laburpentxoa:

  • Nire jaioterriko haziak: Colombiako produktu nagusietako haziak ikusi eta aztertuko ditugu tailer honetan.
  • Cumbiatik Joropora: ziurrenik musika estilo hauek nonbait entzun dituzue; ezin duzue galdu hauek dantzatzen ikasteko aukera.
  • Tajadak, Pataconak eta Buñueloak: askaldu nahi? egun honetan sabela hutsik etortzea gomendatzen dizuegu, Colombiako plater tipikoenak prestatu eta dastatu ditzazuen.
  • “Chivas de barro” tailerra: aukera izango duzue garraiobide tradizionalen miniaturak apaindu, eta ondoren etxera eramateko.
  • Kolonbiar karaokea: nork ez du inoiz abestu Shakiraren abesti bat? Hurbildu zaitez gaztegunera egun honetan, hit kolonbiar nagusiak abestera

<<Kuboaren Mundu Elkarteak (WCA) araututako «Basauri Open Rubik» Txapelketaren hamargarren edizioa Ibaigane Kultur Etxean, azaroaren 17an eta 18an>>

Aurreko bederatzi edizioak Basozelai Gizarte Etxean ospatu ondoren, hamargarren honetan «Basauri Open Rubik» txapelketak Ibaigane Kultur Etxera egin du jauz. Rubik Kuboaren Euskal Elkarteak antolatzen du txapelketa, ZirtZarten eta Kultur Basauriren laguntzarekin. Kuboaren Mundu Elkarteak (WCA) araututako txapelketa ofiziala, azaroaren 17an eta 18an (larunbata eta igandea) egingo dute, goizez eta arratsaldez. Adituak, zaleak eta jakin-mina dutenak batuko dira bertan, berriro ere.

Txapelketan parte hartzeko interesa dutenek aukera dute aldez aurretik izena emateko, WCA-ren webgunearen bitartez. Azaroaren 17an bertan ere, lehen orduan eta txapelketa hasi aurretik, inskripzioa egitekoaukera egongo da.

Aurreko edizioetan nazioarteko zenbait marka hautsi dituzte, eta, eskualdeko talentu gazteez gain, nazioarteko jendea ere etorri da gurera. Joan den urtean 45 gaztek hartu zuten parte «Basauri Open Rubik»en. Aipatzekoa da Daniel Gracia Ortizek Basauriko ordura arteko markarik onena finkatu zuela: 3 x 3 x 3ko kuboa hiru saiakerako batez bestekoarekin, 10,81 segundotan ebatzi zuen.

ARGIBIDE GEHIAGORAKO:
Basauriko Udala – ZirtZart Gazte Bulegoa
- Tel: 944 666 430
- Posta elektronikoa: Helbide elektroniko hau spambot-etatik babestuta dago. JavaScript gaituta izan behar duzu ikusi ahal izateko.
- Webguneak:
o https://sites.google.com/site/basauriopenrubik/basauri-open-2018
o https://www.worldcubeassociation.org/

<<«Halloween jaia» Basozelai Gizarte Etxean urriaren 31n>>

Prest zaudete urteko jairik beldurgarrienerako? JAILLOWEEN festa ospetsuaren hirugarren edizioa izango da aurtengoa. Gorde ezazu urriaren 31-ko arratsaldea, 19:30etik 21:30-era, eta etor zaitez Basozelai Gizarte Etxera, Gaztegune ondoan dagoen gelara, Artunduaga Aretoa, gurekin Haloween gaua ospatzera.

Sabela hutsik etortzea gomendatzen dizuegu, arratsaldean zehar jateko eta edatekoa izango dugulako. Eta eguna borobiltzeko, DJ bat ariko da giroa animatuz-.

Sartzeko, sarrera edo flyera aurkeztu beharko duzue. Hori lortzeko, pasa zaitezte Basozelaiko edo San Migeleko gazteguneetatik, Basozelai Gizarte Etxetik edo Ibaigane Kultur Etxetik urriaren 10etik aurrera. Sarrera doakoa izango da, baina toki kopurua mugatua.

Ez galdu urteko azken jai beldurgarria… Zatoz, eta ekar ezazu zure mozorro ikaragarriena! Zure zain izango gara!

<<«Elikagaien Manipulatzailea» ikastaroa, azaroaren 13tik 14ra>>

Elikadura-segurtasunaren eta higienearen arloko prestakuntza ofiziala, elikagaiekin kontaktuan (kozinatu, ontziratu, banatu, saldu, zerbitzatu,...) diren profesionalei zuzendua.

Denera, sei orduko ikastaroa dugu honakoa. Arrisku handiko elikagaiak manipulatzeko agiria dugu honakoa.

Ikastaroa bukatu eta bertan parte hartu izana egiaztatzen duten ikasleek jasoko dute formakuntza zentroak (GURUTZE GORRIA) bermaturiko egiaztagiria.

-Datak; Azaroak 13 eta 14

-Ordua; 18:00etatik 21:00etara

-Lekua; Basozelai Gizarte Etxea

-Izen-ematea; azaroaren 4ra arte

-Prezioa; 10 € (ikasle edo langabetuak 5 €)

<<«Sare Sozialak» ikastaroa, urriaren 29tik azaroaren 21era>>

Ikastaro hau sare sozial publikoa nahiz pribatua kudeatzeko beharrezko ezaguerak lortu nahi dituztenei zuzenduta dago. Sare sozialen erabilera praktikoa, eta marka baten (bai profil pertsonala bai enpresa marka) inguruan sorkuntza eta gestio lana egiteko baliabideak landuko ditugu.

Ikastaroa bukatu eta bertan parte hartu izana egiaztatzen duten ikasleek jasoko dute formakuntza zentroak (CIPSA) bermaturiko egiaztagiria.

-Datak; Urriak 29 eta 31. Azaroak 5, 7, 12, 14, 19 eta 21

-Ordua; 18:30etatik 20:30etara

-Lekua; Basozelai Gizarte Etxea

-Izen-ematea; urriaren 22ra arte

-Prezioa; 10 € (ikasle edo langabetuak 5 €)

<<Basauriko Gazteguneetan urrian eskainiko den programa>>

Zirt Zart Basauri Gazteria zerbitzutik hil honetan “JAILLOWEEN”-ekin erlazionatutako doako zenbait jarduera eskainiko diegu 12-17 urte bitarteko gazteei. Tailerrak Basozelaiko eta San Migeleko gazteguneetan izango dira. Ez da beharrezkoa izena aurretiaz ematea, baina toki kopurua mugatua izango da. Izena eman ahala sortuko dira taldeak. Jarraian, gure egitarauaren laburpentxoa:

Gymkana: urteko egunik ikaragarriena hurbil dago, horregatik gure ausardia adierazi beharko dugu proba beldurgarri desberdinetan parte hartuz.

Slime tailerra: estresa askatzeko modurik hoberena muki biskatsu hau “aputxurratzea” da.

Halloweeneko makillajea: Halloweeneko look hoberena lortzen lagunduko dizugu makillatzaile aditu baten eskutik.

Jailloween: jai honen hirugarren edizioa ospatuko dugu musika, janari, edari eta hainbat sorpresa gehiagoz. Basozelaiko eta San Migeleko gazteguneetan, eta ZIRTZARTBASAURI Gazte Bulegoan lortu ahal izango dituzue festan aurkeztu beharreko flyerrak, urriaren 10etik aurrera. Sarrera doakoa izango da, baina toki kopurua mugatua. Ezin duzu galdu! Zure zain izango gara.

<<«Ezagutu Korea» topaketa kulturala: irailaren 22an, Basauriko Ibaigane Kultur Etxean>>

Irailaren 22an, egunean zehar, korear kultura ardatz duen jardunaldia egingo da Basauriko Ibaigane Kultur Etxean. Batez ere gazteei zuzenduta dagoen eskaintza publiko horretan, tailer, joko tradizional, film eta dantza-lehiaketaz gozatzeko aukera izango dute parte-hartzaileek. Topaketa ZirtZartek eta Kultur Basaurik antolatu dute, Han-A Association elkartearekin batera.

Goizeko hamaiketan hasi, eta gaueko bederatziak arte luzatuko da ekimena. Antolatutako ekintzetan parte hartzeko plaza-kopuru mugatua dago (aretoa bete arte). Sarrera doakoa da.

Han-A Association espainiar estatuko zenbait kolektibok osaturiko irabazi-asmorik gabeko elkartea da, eta eremu horretan korear kultura sustatzea du helburu –hain zuzen ere, Hego Koreako kultura–. Euskadin, zenbait ekintza eta tailer burutu dituzte, joko tradizionalak eta «KPOP» dantzaren erakusketak, besteak beste. «Hallyu» izenpean ezagun den moda korearraren gako da azken hori, zeina kultura korearra mundura hedatzearen korronteari lotua baitago.

Egitaraua:
- Joko eta tailer tradizional korearrak → 11:00 – 13:00
- Emanaldia → 15:00 – 17:00
- «KPOP» jokoak → 17:00 – 19:00
- Dantza-lehiaketa → 19:00 – 21:00

Non Gaude

GIB, Entsegu Gelak eta Basozelaiko Gaztegunea
 Basozelai Kalea 11 zk. 48970 Basauri Bizkaia
Telefonoa: (+ 94 466 64 00)
WhatsApp: (+ 634 984 615)
 zirtzart@basauri.eus
San Migeleko Gaztegunea
 Gernika 60 zk. 48970 Basauri Bizkaia
Telefonoa: (+ 94 466 64 71)
 zirtzart@basauri.eus

 Basauriko Udala TTII | Pribatutasun politika

Bilatu