ongravity miniatura<<Irteera Barakaldo ONGRAVITYra, azaroaren 28an, ZirtZart Basaurik antolatuta>>

 

Zirt Zart Basauri Gazteria zerbitzuak Barakaldoko ONGRAVITYra joateko irteera antolatu du, azaroaren 28an, 12 eta 30 urte bitarteko gazteentzat.

ONGRAVITY aisialdiko freestyle parkea da, eta bertan Parkour, Ninja Warrior edo ohe elastikoetan salto egiteko aukera izango duzu, inoiz imajinatu ez duzun bezala.

Joan-etorria metroz egingo dugu. Ordutegien aldetik, gazteek goizeko 09:00etan egon beharko dute Basauriko udaletxearen ondoko metro geltokian, eta eguerdiko 13:00ean itzuliko gara leku berera.

Jarduera horretarako arropa erosoa eta BARIK eramatea aholkatzen dugu.

Plazak mugatuak dira, eta, kopurua gaindituz gero, zozketa egingo dugu parte-hartzaileak hautatzeko. Izen-emateko azken eguna azaroaren 22a izango da.

EMAN IZENA

azaroak txikia<<AZAROA GAZTEGUNEAN>>

Zirt Zart Basauri Gazteria zerbitzuak, hil honetan, “Emakumeen kontrako indarkeriaren aurkako nazioarteko eguna” gaiarekin lotutako doako zenbait jarduera eskainiko die 12-17 urte bitarteko gazteei. Tailerrak Basozelaiko gaztegunean izango dira. Ez da beharrezkoa izena aurretiaz ematea, baina toki kopurua mugatua izango da. Izena eman ahala sortuko dira taldeak. Jarraian, gure egitarauaren laburpentxoa:

Kamera estenopeikoa: bi saioko tailer honetan kamera estenopeiko bat sortuko dugu, zerotik hasita. Bigarren saioan lortutako argazkiak errebelatuko ditugu, hileko gaiarekin zerikusia izango dutenak.

Emakumeen kontrako indarkeriaren aurkako nazioarteko eguna:
Genero-indarkeriari buruzko gogoeta egingo dugu hainbat jardueraren bidez, eta horren inguruan zer egin dezakegun ikasiko dugu.

Irteera Barakaldo Ongravityra: freestyle kirolak ezagutzen dituzue? Zatoz gurekin Bizkaiko freestyle parke indoor handienera, non adituen laguntza izango dugun diziplina hauek ikasteko: Parkour, Ninja Warriors, akrobaziak ohe elastikoetan, etab…EMAN IZENA HEMEN

<<Ainhoa Sagasti, Dekot eta Full Cab, Rockeinen bederatzigarren edizioaren kategoria nagusiko finalistak>>

     - Julen Burgos, Kurixe eta La Nevera Vacía izango dira Tokiko artistarik onenari saria irabazteko hautagaiak

     - Finala azaroaren 27an, larunbatez, izango da Basauriko Social Antzokian. Publikoa zutik egongo da eta doako sarrera izango da, gonbidapenarekin

Ainhoa Sagasti, 19 urteko gazte getxoztarra; Maruri-Jatabeko Dekot taldea; eta Bilbon errotuta dagoen Full Cab rock laukotea izango dira Rockeinen bederatzigarren edizioaren sari nagusia irabazteko hiru hautagaiak.

Finalean joko duten beste hiru artistak Julen Burgos, Laudioko kantautore gaztea; Kurixe pop-rock laukotea (kideetako bat Arrigorriagan bizi da); eta La Nevera Vacía (indie rocka Galdakaotik, Barakaldotik eta Bilbotik) dira. Hiru proiektu hauek Tokiko artistarik onenari saria irabazteko aukera izango dute, Basauri, Arrigorriaga, Galdakao edo Laudion erroldatutako kide bat gutxienez daukaten proiektuak saritzen dituen kategorian.

Finala azaroaren 27an, larunbatez, izango da Basauriko Social Antzokian. Sarrera doakoa izango da, baina gonbidapenak eskuratu beharko dira socialantzokia.eus webgunearen bitartez azaroaren 3ko eguerditik aurrera. Publikoa zutik egongo da, gehienezko edukierarekin eta indarrean dauden osasun neurriak beteko dira.

Ohi bezala, Rockeineko 4 kategorien irabazleen izenak (Artistarik onena euskaraz eta Eskarabilera saria, barne) finalean bertan jakinaraziko ditu epaimahaiak.

Iragan irailaren 30ean itxi zen Rockein-en 9. edizioan izena emateko epea. Lehiaketa musikala Basauriko Udalak antolatzen du, Arrigorriaga, Galdakao eta Laudioko Udalen eta Bizkaiko Foru Aldundiaren laguntzaz, eta Euskal Autonomi Erkidego eta Nafarroako bakarlari eta taldeei zuzenduta dago. 179 artistak eman dute izena, seigarren urtez jarraian parte hartze marka gaindituz.

ROCKEIN 2021 FINALA
Larunbata, azaroak 27
21.00 (ateen irekitzea), 21.30 (kontzertuen hasiera)
Tokiko artistarik onena
JULEN BURGOS • KURIXE • LA NEVERA VACÍA
Sari nagusia
AINHOA SAGASTI • DEKOT • FULL CAB
Gonbidapenak socialantzokia.eus webgunean azaroaren 3tik aurrera

SARIAK:

Talde irabazlea
- EP profesional bat (gutxienez bost abesti) grabatzea, ekoiztea eta masterizatzea Bilboko El Tigre estudioetan.
- EParen 500 kopia editatzea, CD euskarrian.
- Bideoklip profesional bat grabatu eta ekoiztea.
- MAZ Basauri jaialdian kontzertua eskaintzea

Tokiko talderik onena
- MAZ Basauri jaialdian kontzertua eskaintzea

Euskarazko talderik onena
- Abesti bat grabatzea eta ekoiztea.
- MAZ Basauri jaialdian kontzertua eskaintzea

Eskarabilera saria
- MAZ Basauri jaialdian kontzertua eskaintzea

Informazio gehiago:
www.facebook.com/rockein
Twitter: @rockeinrock

RubikTokapekaAbenduak9<<Basauri Open Rubik txapelketa ofizialak eskainitako plaza guztiak agortu dira inskripzio-epea ireki eta minutu gutxira>>

    - Antolatzaileek beste “topaketa” bat egitea erabaki dute.

    - Topaketa hori txapelketa ofizialaren aurretik izango da, formatu ez- ofizialean.

Urriaren 18an iragarri zen ofizialki Basauri Open Rubik txapelketa internazionalaren hurrengo edizioa, abenduaren 11n Ibaigane Kultur Etxean jokatuk dena. Deialdiarekin batera, izena emateko epea ireki eta minutu gutxira plaza guztiak bete ziren, eta itxaron-zerrenda luzea sortu zen. Nabaria da Covid-19aren eraginez, iaz eta aurten, mundu mailan, txapelketa ofizialik jokatu ez dela, eta horrek jokalarien gogoa areagotu duela. Horri gehitu behar diogu, 2020ko martxotik hona, estatuan jokatuko den lehen txapelketa ofiziala dugula Basaurikoa. Hori guztia dela eta, Basauri Open Rubik txapelketako antolatzaileek (Basauriko Udalaren ZirtZart gazte zerbitzuak eta Euskal Rubik erakundeak) lehiaketa ofizialaz gain topaketa ez-ofiziala eskaintzea adostu dute.

Abenduaren 9an, osteguna, topaketa berezia egiteko deialdia egiten dugu Rubik kuboaren jokalari hasi berriak zein adituak biltzeko helburuarekin. Basauriko Basozelai Gizarte Etxean egingo da 18:00etan hasita eta, gutxi gora-behera, ordu bi eta erdiko iraupena izatea iragarri da. Arratsaldean zehar hautsi litekeen denbora-markak ez luke izango balio ofizialik, WCA-tik kanpo sortutako ekimena baita (topaketa ez-ofiziala), eta abenduaren 11n Ibaigane Kultur Etxean jokatua den txapelketa ofizialaren atarikotzat hartuko dugu.

Topaketan parte hartu nahi duen orok aldez aurretik izena eman beharko du, ZirtZart Basauriren webgunean, eta abenduaren 5era bitartean arte egongo da epea zabalik. Parte-hartzeari dagokionez, 12-35 urte bitartekoek lehentasuna izango dute.

Parte-hartzaileek Rubik kuboa besterik ez dute ekarri beharko dibertsioz beteriko arratsaldeaz gozatzeko.

Asian Dance Contest comp<<Abenduaren 18an, Basaurin, Asian Dance Contest dantza lehiaketa>>

12-35 urte bitarteko gazteei zuzendutako dantza lehiaketa abenduaren 18an ospatuko da Basauriko Ibaigane Kultur Etxean, Basauriko Udalaren ZirtZart gazte zerbitzuak, Spicy Ramen erakundearekin lankidetzan antolatuta.

Parte-hartzaileek nahitaez abesti asiarrak (japoniarrak, txinatarrak, korearrak,…) erabili beharko dituzte, eta horietan bertako hizkuntzak izan beharko du nagusi. Horrez gain, ez dira onartuko hautaturiko abestiarenak ez diren koreografiak. Hots, jatorrizko artistarenak ez diren dantza pausoak ez dira onartuko. Lehiaketan kategoria bi nabarmendu dira: bakarlari moduan oholtza gainean dantzatuko direnak, “backdancer”en laguntzarik gabe, eta taldekako (2-6 partaide bitartean) koreografia lanak. Kategoria bakoitzeko lehen bi sailkatuek jasoko dute 75-200 euro bitarteko saria.

Abenduaren 18an eszenatokian dantzan aritu nahi duen orok aldez aurretik izena eman beharko du. Horretarako, antolakuntzak ZirtZart gazte zerbitzuaren webgunean eskuragarri jarri ditu bai oinarriak baita bete eta aurkeztu beharreko dokumentuak ere. Dokumentu horiek zuzenean aurkezteko aukera badago Basozelai Gizarte Etxeako Gazte Informazio Bulegoan. Inskripzio epea azaroaren 8tik abenduaren 8ra bitartean arte egongo da zabalik. Lehiakideen kopurua mugatua da, eta izen-emate hurrenkeraren arabera sortuko da zerrenda.

Lehiaketak eskaintzen dituen sariak:

  • Taldekako lehen sailkatua → 200 €
  • Taldekako bigarren sailkatua → 125 €
  • Bakarkako lehen sailkatua → 150 €
  • Bakarkako bigarren sailkatua → 75 €

Publikoari dagokionez, sarrera doakoa da areto nagusia bete arte. Musukoaren erabilera derrigorrezkoa da, eta debekatuta dago bertan jatea.

Izena emateko lotura, HEMEN
Lehiaketaren oinarriak, HEMEN

<<Abenduaren 11n, Basaurin, Rubik kuboa berriro protagonista>>

Beste behin ere, Basauriko Ibaigane Kultur Etxean egingo da Rubik Kuboren Erakunde Mundialak (WCA) antolatutako nazioarteko Rubik txapelketa, formatu ofizialean. Lehiaketa honen antolatzaileek (Basauriko Udalaren ZirtZart gazte zerbitzua eta Euskal Rubik erakundea) lortu dute erakunde mundialak finkaturiko baldintzak betetzea, eta horri esker COVID-19aren agerpenaren ondoren hauxe izango da estatuan jokatuko den lehen txapelketa. 2020an nahitaez izandako geldiunearen ostean, aurtengoa hamabigarren edizioa izango dugu.

Zortzi kategoria ezberdin jokatuko dira: 2x2x2, 3x3x3, 4x4x4, 5x5x5, Skewb, Pyraminx, Blind eta Square-1. Goizeko hamarretatik hasita hamar bat orduko iraupena duen jardunaldia iragarrita dago. Lehiakideen esku egongo da hautatzea zein kategoriatan jokatu.

Lehiaketan parte hartu nahi duen orok aldez aurretik izena eman beharko du, horretarako sorturiko webgunearen bitartez, https://www.worldcubeassociation.org/competitions/BasauriOpen2021, eta abenduaren 5era bitartean arte egongo da epea zabalik. Lehiakideen kopurua mugatua da, eta izen-emate hurrenkeraren arabera sortuko da zerrenda. Parte-hartzaile zerrendako batek egun horretan bertaratzea ezinezkoa balu, antolakuntzari horren berri eman beharko dio itxaron-zerrendan dagoen batek bere postua bete dezan.

Publikoari dagokionez, sarrera doakoa da areto nagusia bete arte. Musukoaren erabilera derrigorrezkoa da, eta debekatuta dago bertan jatea.

Izena emateko lotura, HEMEN

Ordutegia, HEMEN

Protokoloa “Basauri Open 2021”ean, HEMEN

<<Rockeinek bere parte hartze marka gainditu du seigarren urtez jarraian, 179 proiektuk izena eman ostean>>

  • 25 proiektu Tokiko talderik onenari sarira hautagai izango dira; 33, Euskarazko talderik onenari; eta 20k, Eskarabilera saria jasotzeko aukera izango dute
  • Nabarmentzekoa da jasotako proposamenak berritzeko gaitasuna, parte hartzaileen %35a berriak baitira
  • Finala azaroaren 27an izango da Basauriko Social Antzokian

Iragan ostegunean, irailak 30, itxi zen Rockein-en 9. edizioan izena emateko epea. Lehiaketa musikala Basauriko Udalak antolatzen du, Arrigorriaga, Galdakao eta Laudioko Udalen eta Bizkaiko Foru Aldundiaren laguntzaz, eta Euskal Autonomi Erkidego eta Nafarroako bakarlari eta taldeei zuzenduta dago.

179 artistak eman dute izena, seigarren urtez jarraian parte hartze marka gaindituz. Jasotako proposamenen artean 25 tokikoak dira (Basauri, Galdakao, Arrigorriaga edo Laudion erroldatutako kide bat, gutxienez); 33 euskarazko talderik onenari saria lortzeko hautagai dira (2020an, 22); eta 20k Eskarabilera saria eskuratzeko aukera izango dute (gutxienez kideen %50 emakumeak dituzten proiektuak).

Nabarmentzekoa da lehiaketak jasotako proposamenak berritzeko duen gaitasuna, parte hartzaileen %35a 2020arekiko berriak baitira, azken 12 hilabeteetan taldeek abestiak idazteko edo entseguak egiteko biltzeko izan dituzten zailtasunak gaindituz.

Epai mahai profesionala
179 proposamenak epai mahaiaren eskuetan daude. Ondorengo pertsonek osatuko dute epai mahaia:

  1. Arantzazu Pinto ‘Nara’
    Madrileko Mad Cool festibalean eta Live Nation Españan artisten kontratazioa
  2. Álvaro Fierro
    Musika-kritikaria, musika-dokumentalen zuzendaria eta Cultumetríako arduraduna, Kulturaren alorrean eragin-ikerketak egiten dituen enpresa
  3. Amets Rodríguez
    Emankor Sarean promotorea eta ekitaldien antolatzailea (Mundaka Festival, Bay Of Biscay…)
  4. Jon Agirrezabalaga
    WAS eta Zabala proiektuetan musikaria eta konpositorea. Bilboko El Tigre estudioetan produktore eta soinu ingeniaria
  5. Sara Zozaya
    Artista. Rockeinen sari nagusia irabazi duen lehen emakume bakarlaria (2019).
  6. Asier Arrieta
    UPV-EHUko Publizitate irakaslea eta Sormenean aditua
  7. Mariana Pérez
    Bateria jotzaile profesionala (Maika Makovski, The Manilas, Rubén Pozo, Lichis, Sonic Trash, Cápsula, Audience, Rubia…)
  8. Iker Bárbara
    MondoSonoro aldizkariko Euskal Herria eta Errioxako edizioaren koordinatzailea, promotorea eta DJa
  9. Iratxe Rubio
    Arrigorriagako Udaleko Kultura eta Gazteria zinegotzia
  10. Joseba Vegas
    Musika-kazetaria, BI FMko zuzendaria, eta DJa
  11. Jon Hervás
    Promotorea eta kultura-eragilea

Finala Basauriko Social Antzokian izango da eta 6 finalisten izenak hurrengo 15-20 eguneko epean jakinaraziko dira.

Parte-hartzearen bilakaera
Rockeinek parte-hartzaile kopurua bikoiztu du 2013ko lehen ediziotik, honako bilakaera honekin:

2013: 85 parte-hartzaile
2014: 105 parte-hartzaile
2015: 95 parte-hartzaile
2016: 110 parte-hartzaile
2017: 129 parte-hartzaile
2018: 135 parte-hartzaile
2019: 146 parte-hartzaile
2020: 169 parte-hartzaile
2021: 179 parte-hartzaile

SARIAK:

Talde irabazlea
- EP profesional bat (gutxienez bost abesti) grabatzea, ekoiztea eta masterizatzea Bilboko El Tigre estudioetan.
- EParen 500 kopia editatzea, CD euskarrian.
- Bideoklip profesional bat grabatu eta ekoiztea.
- Bizkaiko areto nagusienetako batean edo MAZ Basauri jaialdian kontzertua eskaintzea (antolatzaileek zehaztuko dute).

Tokiko talderik onena
- Bizkaiko areto nagusienetako batean edo MAZ Basauri jaialdian kontzertua eskaintzea (antolatzaileek zehaztuko dute).

Euskarazko talderik onena
- Abesti bat grabatzea eta ekoiztea.
- Bizkaiko areto nagusienetako batean edo MAZ Basauri jaialdian kontzertua eskaintzea (antolatzaileek zehaztuko dute).

Eskarabilera saria
- Bizkaiko areto nagusienetako batean edo MAZ Basauri jaialdian kontzertua eskaintzea (antolatzaileek zehaztuko dute).

Informazio gehiago:
www.facebook.com/rockein
Twitter: @rockeinrock

<<Urrian hasita, astero, skate indoor ikastaroa Basauriko gazteentzat >>

ZirtZartek, Basauri Udaleko gazte zerbitzuak, skate ikastaroa programatu du, profesionalek gidatua eta espazio itxian. Ikastaro hau Skatepark "Life Skate Park" izeneko instalazioan emango dute, Basauriko enpresa laguntzaile horrek dituen 2400 metro koadroko instalazio estali berrietan.

Bereziki Basaurin erroldaturiko gazteei zuzenduta dago (12-35 urte tarteko pertsonei). Urrian hasita, abendura bitartera luzatuko dira klaseak eta parte hartzaileek astero 90 minutuko saio pertsonalizatua jasoko dute. Kategoria bi nabarmendu behar ditugu: adingabeak eta nagusiak. Lehenek aukera izango dute astelehenetik ostegunera, 17:00-18:30 ordutegian, egokien duten txanda hautatzeko, eta bigarrenek, aldiz, astearte edo osteguneko txanda, 20:00-21:30 ordutegian.

Hautaketa hori ikastaroan izena emateko orduan zehaztu beharko dute.

Parte hartu nahi duten gazteek urriaren 10era bitartera dute izena emateko epea. Izena ematea telematikoki egiteko aukera dago ZirtZart Basauri webgunean; eta modu presentzialean ere, arreta pertsonalizatua eskainiko du Basozelai Gizarte Etxeko Gazte Informazio bulegoak. Plaza kopuru mugatua da, eta «ZirtZart Bazkide Txartela» duten gazteek abantaila izango dute. Kuotari dagokionez, bazkideek 20€ ordaindu beharko dute ikastaroan parte hartzeagatik; herrian erroldatua egon baina bazkide ez direnek 30 €, eta, azkenik, plaza librerik balego Basaurin erroldatuak ez direnek 65 €.

· IZENA EMAN ·

Non Gaude

GIB, Entsegu Gelak eta Basozelaiko Gaztegunea
 Basozelai Kalea 11 zk. 48970 Basauri Bizkaia
Telefonoa: (+ 94 466 64 00)
WhatsApp: (+ 634 984 615)
 zirtzart@basauri.eus
San Migeleko Gaztegunea
 Gernika 60 zk. 48970 Basauri Bizkaia
Telefonoa: (+ 94 466 64 71)
 zirtzart@basauri.eus

 Basauriko Udala TTII | Pribatutasun politika

Bilatu