«Festibas» jaialdiaren zortzigarren edizioa maiatzaren 21ean ospatuko da; zuzenekoak eta masterclass bikoitza Robert Rodrigo eta Dann Hoyosen eskutik
- Masterclass bikoitza Ibaigane Kultur Etxean, 17:30etik aurrera
- Zuzenekoak San Isidro plazan, 20:00etatik aurrera
Kyrae, Infarto eta Sindikato del Ruido talde basauriarrak izango dira aurtengo zikloan zuzenean arituko direnak; hain zuzen ere, maiatzaren 21ean Basauriko San Isidro plazan, eta auzoko jaien ospakizunekin bat eginez. Aurtengoan, nobedade gisa, kontzertuez gain Robert Rodrigo eta Dann Hoyos musikariek zuzenduriko masterclass bikoitza ere eskainiko da Ibaigane Kultur Etxean.
«Festibas» jaialdiak -ZirtZart Basaurik antolatua (Basauriko Udalaren gazte zerbitzua) Musika Master, Kultur Basauri eta Txantxangorri Bentako Auzo Lagunak Elkarte Kulturala laguntzaile dituela- helburu du herriko bandei zuzenean jotzeko aukera ematea, formatu profesionalean, eta proiektu bakoitza ikusleen aurrean sustatzea jai-giroan.
Jaialdia arratsaldeko 17:30ean hasiko da, Ibaigane Kultur Etxean ; bertan, Robert eta Dann musikariak oholtza gainean arituko dira euren ibilbide luzeetan hobetu dituzten teknika eta trikimailu batzuk errepasatzen. Bertaratzen diren entzuleek aukera izango dute gitarraren heroi horiei galderak egiteko. Klasea euren abilezien erakustaldi batekin amaituko da. Sarrera doakoa izango da edukiera bete arte.
Ondoren, 20:00etan, fokoak San Isidro plazan piztuko dira zuzenekoen hasierarekin batera, eta orduan Kyrae (rock metal melodiko/progresiboa), Infarto (rock&roll) eta Sindikato del Ruido taldeek hartuko dute lekukoa, eta nork bere musika ikusleen aurrean defendatuko dute.
ZirtZart Basaurik hamaika inskripzio jaso ditu musika jaialdian parte hartzeko, eta horien artetik aukeratu dira San Isidro plazan arituko direnak. Bandak aukeratzerakoan, hizkuntza, taldekideen adina eta bandak aurreko edizioetan parte hartu duen ala ez hartu da kontuan.