CARTELGABONGAZTE txiki<< GABON GAZTE >>

Urtero bezala, aurtengo Gabonetan ere, GABON GAZTE programa eskainiko diegu 12-16 urte bitarteko gazteei, Basozelaiko Gaztegunean. Ekimena abenduaren 27, 28, 29 eta 30ean eta urtarrilaren 3 eta 4an izango da, goizeko 11:00etatik 13:00etara.

Egun horietan, hainbat jarduera egingo ditugu, Gaztegunean bertan zein Gaztegunetik kanpo. Hala nola: jolasak, eskulanak, irteera… eta askoz gehiago! Ezin duzue galdu!

Toki kopurua mugatua da; beraz, parte hartu nahi duten gazteek abenduaren 20a baino lehenago eman beharko dute izena. Tailerretan izena emateko, Basauriko gazte bulegoan edo ZirtZarteko webgunean sartu beharko dira, eta bi aukera hauetako bat aukeratu:
Bazkideak: 8 €
Gainerakoak: 15 €
                                                                                                                                                    - EMAN IZENA -

Gabon Tekno Campusa 2021 comp«Gabon Tekno Campusa» abenduaren 27tik 30era bitartean, Basauriko Arizko Dorretxean

Robotak eta bideo-jokoak sortu eta programatzea gustuko duten gazteei zuzenduriko Gabonetako campusa antolatu du Basauriko Udalaren ZirtZart Gazte Zerbitzuak. Bertan, besteak beste, Scratch, Kodu edota mBot sistemak ezagutu eta erabiltzeko aukera izango dute, STEAM metodologia oinarri izanda. Denera, lau saiok osatzen dute eskaintza, eta bakoitzak hiru orduko iraupena izango du.

Gabon Tekno Campusean parte hartu ahal izateko 12-16 urte bitartekoa izan behar da. Ekimena Basauriko Arizko Dorretxean egingo da, abenduaren 27tik 30era bitartean, 10:00etatik 13:00etara. Interesdunek abenduaren 20ra artea dute izena emateko epea; telematikoki inskripzioa egiteko aukera dago ZirtZart Basauri webgunean, eta modu presentzialean ere Basozelai Gizarte Etxeako Gazte Informazioa Bulegoan. Plaza kopuru mugatua dago, eta «ZirtZart Bazkide Txartela» duten gazteek lehentasuna izango dute. Prezioari dagokionez, bazkideek 12€ ordaindu beharko dute ikastaroan parte hartzeagatik, eta aldiz, herrian erroldatuta egon baina bazkide ez direnek, 18 €.

· IZENA EMAN · 

Gabonetako Bingoa 2021 OK<<Abenduaren 17an «Bingo Txouuu!!!» umorezko ikuskizuna Basauriko Ibaigane Kultur Etxean, sari berezi ugarirekin>>

Basauriko Udalaren ZirtZart gazte zerbitzuak deialdia egin die herrian erroldatutako 12-35 urte bitarteko gazteei, Bingo Txouuu!!! umorezko ikuskizunean parte hartu dezaten. Emanaldia abenduaren 17an, ostirala, Ibaigane Kultur Etxean izango da 18:30etik aurrera, eta bertan umorez jositako bingo-jokoa iragarri da. Horretan hainbat sari banatuko dira:herriko saltokietan erabiltzeko kontsumo bonuak, kirol eta kultura bonuak, Gabonetako otzarak… eta askoz gehiago!

Sarrera doakoa izango da, areto nagusia bete arte. Gonbidapenak azaroaren 15etik aurrera egongo dira eskuragarri Basozelai Gizarte Etxeko Gazte Informazio Bulegoan. ZirtZart Bazkide bakoitzak gonbidapen bakarra jaso dezake, bere izenean.

Ikuskizuna 19:00etan jarriko da abian Ibaiganeko areto nagusian, eta sartu ahal izateko, derrigorrean, gonbidapena aurkeztu beharko da. Ateak 18:30ean zabalduko dira.

Oraindik ez duzu bazkide txartelik? 12-35 urte bitartean badituzu eta Basaurin erroldatuta bazaude, egin eskaera (KLIKATU HEMEN), eta horri esker hainbat programa eta zerbitzuz gozatzeko aukera lortuko duzu.

ongravity miniatura<<Irteera Barakaldo ONGRAVITYra, azaroaren 28an, ZirtZart Basaurik antolatuta>>

 

Zirt Zart Basauri Gazteria zerbitzuak Barakaldoko ONGRAVITYra joateko irteera antolatu du, azaroaren 28an, 12 eta 30 urte bitarteko gazteentzat.

ONGRAVITY aisialdiko freestyle parkea da, eta bertan Parkour, Ninja Warrior edo ohe elastikoetan salto egiteko aukera izango duzu, inoiz imajinatu ez duzun bezala.

Joan-etorria metroz egingo dugu. Ordutegien aldetik, gazteek goizeko 09:00etan egon beharko dute Basauriko udaletxearen ondoko metro geltokian, eta eguerdiko 13:00ean itzuliko gara leku berera.

Jarduera horretarako arropa erosoa eta BARIK eramatea aholkatzen dugu.

Plazak mugatuak dira, eta, kopurua gaindituz gero, zozketa egingo dugu parte-hartzaileak hautatzeko. Izen-emateko azken eguna azaroaren 22a izango da.

EMAN IZENA

azaroak txikia<<AZAROA GAZTEGUNEAN>>

Zirt Zart Basauri Gazteria zerbitzuak, hil honetan, “Emakumeen kontrako indarkeriaren aurkako nazioarteko eguna” gaiarekin lotutako doako zenbait jarduera eskainiko die 12-17 urte bitarteko gazteei. Tailerrak Basozelaiko gaztegunean izango dira. Ez da beharrezkoa izena aurretiaz ematea, baina toki kopurua mugatua izango da. Izena eman ahala sortuko dira taldeak. Jarraian, gure egitarauaren laburpentxoa:

Kamera estenopeikoa: bi saioko tailer honetan kamera estenopeiko bat sortuko dugu, zerotik hasita. Bigarren saioan lortutako argazkiak errebelatuko ditugu, hileko gaiarekin zerikusia izango dutenak.

Emakumeen kontrako indarkeriaren aurkako nazioarteko eguna:
Genero-indarkeriari buruzko gogoeta egingo dugu hainbat jardueraren bidez, eta horren inguruan zer egin dezakegun ikasiko dugu.

Irteera Barakaldo Ongravityra: freestyle kirolak ezagutzen dituzue? Zatoz gurekin Bizkaiko freestyle parke indoor handienera, non adituen laguntza izango dugun diziplina hauek ikasteko: Parkour, Ninja Warriors, akrobaziak ohe elastikoetan, etab…EMAN IZENA HEMEN

<<Ainhoa Sagasti, Dekot eta Full Cab, Rockeinen bederatzigarren edizioaren kategoria nagusiko finalistak>>

     - Julen Burgos, Kurixe eta La Nevera Vacía izango dira Tokiko artistarik onenari saria irabazteko hautagaiak

     - Finala azaroaren 27an, larunbatez, izango da Basauriko Social Antzokian. Publikoa zutik egongo da eta doako sarrera izango da, gonbidapenarekin

Ainhoa Sagasti, 19 urteko gazte getxoztarra; Maruri-Jatabeko Dekot taldea; eta Bilbon errotuta dagoen Full Cab rock laukotea izango dira Rockeinen bederatzigarren edizioaren sari nagusia irabazteko hiru hautagaiak.

Finalean joko duten beste hiru artistak Julen Burgos, Laudioko kantautore gaztea; Kurixe pop-rock laukotea (kideetako bat Arrigorriagan bizi da); eta La Nevera Vacía (indie rocka Galdakaotik, Barakaldotik eta Bilbotik) dira. Hiru proiektu hauek Tokiko artistarik onenari saria irabazteko aukera izango dute, Basauri, Arrigorriaga, Galdakao edo Laudion erroldatutako kide bat gutxienez daukaten proiektuak saritzen dituen kategorian.

Finala azaroaren 27an, larunbatez, izango da Basauriko Social Antzokian. Sarrera doakoa izango da, baina gonbidapenak eskuratu beharko dira socialantzokia.eus webgunearen bitartez azaroaren 3ko eguerditik aurrera. Publikoa zutik egongo da, gehienezko edukierarekin eta indarrean dauden osasun neurriak beteko dira.

Ohi bezala, Rockeineko 4 kategorien irabazleen izenak (Artistarik onena euskaraz eta Eskarabilera saria, barne) finalean bertan jakinaraziko ditu epaimahaiak.

Iragan irailaren 30ean itxi zen Rockein-en 9. edizioan izena emateko epea. Lehiaketa musikala Basauriko Udalak antolatzen du, Arrigorriaga, Galdakao eta Laudioko Udalen eta Bizkaiko Foru Aldundiaren laguntzaz, eta Euskal Autonomi Erkidego eta Nafarroako bakarlari eta taldeei zuzenduta dago. 179 artistak eman dute izena, seigarren urtez jarraian parte hartze marka gaindituz.

ROCKEIN 2021 FINALA
Larunbata, azaroak 27
21.00 (ateen irekitzea), 21.30 (kontzertuen hasiera)
Tokiko artistarik onena
JULEN BURGOS • KURIXE • LA NEVERA VACÍA
Sari nagusia
AINHOA SAGASTI • DEKOT • FULL CAB
Gonbidapenak socialantzokia.eus webgunean azaroaren 3tik aurrera

SARIAK:

Talde irabazlea
- EP profesional bat (gutxienez bost abesti) grabatzea, ekoiztea eta masterizatzea Bilboko El Tigre estudioetan.
- EParen 500 kopia editatzea, CD euskarrian.
- Bideoklip profesional bat grabatu eta ekoiztea.
- MAZ Basauri jaialdian kontzertua eskaintzea

Tokiko talderik onena
- MAZ Basauri jaialdian kontzertua eskaintzea

Euskarazko talderik onena
- Abesti bat grabatzea eta ekoiztea.
- MAZ Basauri jaialdian kontzertua eskaintzea

Eskarabilera saria
- MAZ Basauri jaialdian kontzertua eskaintzea

Informazio gehiago:
www.facebook.com/rockein
Twitter: @rockeinrock

RubikTokapekaAbenduak9<<Basauri Open Rubik txapelketa ofizialak eskainitako plaza guztiak agortu dira inskripzio-epea ireki eta minutu gutxira>>

    - Antolatzaileek beste “topaketa” bat egitea erabaki dute.

    - Topaketa hori txapelketa ofizialaren aurretik izango da, formatu ez- ofizialean.

Urriaren 18an iragarri zen ofizialki Basauri Open Rubik txapelketa internazionalaren hurrengo edizioa, abenduaren 11n Ibaigane Kultur Etxean jokatuk dena. Deialdiarekin batera, izena emateko epea ireki eta minutu gutxira plaza guztiak bete ziren, eta itxaron-zerrenda luzea sortu zen. Nabaria da Covid-19aren eraginez, iaz eta aurten, mundu mailan, txapelketa ofizialik jokatu ez dela, eta horrek jokalarien gogoa areagotu duela. Horri gehitu behar diogu, 2020ko martxotik hona, estatuan jokatuko den lehen txapelketa ofiziala dugula Basaurikoa. Hori guztia dela eta, Basauri Open Rubik txapelketako antolatzaileek (Basauriko Udalaren ZirtZart gazte zerbitzuak eta Euskal Rubik erakundeak) lehiaketa ofizialaz gain topaketa ez-ofiziala eskaintzea adostu dute.

Abenduaren 9an, osteguna, topaketa berezia egiteko deialdia egiten dugu Rubik kuboaren jokalari hasi berriak zein adituak biltzeko helburuarekin. Basauriko Basozelai Gizarte Etxean egingo da 18:00etan hasita eta, gutxi gora-behera, ordu bi eta erdiko iraupena izatea iragarri da. Arratsaldean zehar hautsi litekeen denbora-markak ez luke izango balio ofizialik, WCA-tik kanpo sortutako ekimena baita (topaketa ez-ofiziala), eta abenduaren 11n Ibaigane Kultur Etxean jokatua den txapelketa ofizialaren atarikotzat hartuko dugu.

Topaketan parte hartu nahi duen orok aldez aurretik izena eman beharko du, ZirtZart Basauriren webgunean, eta abenduaren 5era bitartean arte egongo da epea zabalik. Parte-hartzeari dagokionez, 12-35 urte bitartekoek lehentasuna izango dute.

Parte-hartzaileek Rubik kuboa besterik ez dute ekarri beharko dibertsioz beteriko arratsaldeaz gozatzeko.

Asian Dance Contest comp<<Abenduaren 18an, Basaurin, Asian Dance Contest dantza lehiaketa>>

12-35 urte bitarteko gazteei zuzendutako dantza lehiaketa abenduaren 18an ospatuko da Basauriko Ibaigane Kultur Etxean, Basauriko Udalaren ZirtZart gazte zerbitzuak, Spicy Ramen erakundearekin lankidetzan antolatuta.

Parte-hartzaileek nahitaez abesti asiarrak (japoniarrak, txinatarrak, korearrak,…) erabili beharko dituzte, eta horietan bertako hizkuntzak izan beharko du nagusi. Horrez gain, ez dira onartuko hautaturiko abestiarenak ez diren koreografiak. Hots, jatorrizko artistarenak ez diren dantza pausoak ez dira onartuko. Lehiaketan kategoria bi nabarmendu dira: bakarlari moduan oholtza gainean dantzatuko direnak, “backdancer”en laguntzarik gabe, eta taldekako (2-6 partaide bitartean) koreografia lanak. Kategoria bakoitzeko lehen bi sailkatuek jasoko dute 75-200 euro bitarteko saria.

Abenduaren 18an eszenatokian dantzan aritu nahi duen orok aldez aurretik izena eman beharko du. Horretarako, antolakuntzak ZirtZart gazte zerbitzuaren webgunean eskuragarri jarri ditu bai oinarriak baita bete eta aurkeztu beharreko dokumentuak ere. Dokumentu horiek zuzenean aurkezteko aukera badago Basozelai Gizarte Etxeako Gazte Informazio Bulegoan. Inskripzio epea azaroaren 8tik abenduaren 8ra bitartean arte egongo da zabalik. Lehiakideen kopurua mugatua da, eta izen-emate hurrenkeraren arabera sortuko da zerrenda.

Lehiaketak eskaintzen dituen sariak:

  • Taldekako lehen sailkatua → 200 €
  • Taldekako bigarren sailkatua → 125 €
  • Bakarkako lehen sailkatua → 150 €
  • Bakarkako bigarren sailkatua → 75 €

Publikoari dagokionez, sarrera doakoa da areto nagusia bete arte. Musukoaren erabilera derrigorrezkoa da, eta debekatuta dago bertan jatea.

Izena emateko lotura, HEMEN
Lehiaketaren oinarriak, HEMEN

Non Gaude

GIB, Entsegu Gelak eta Basozelaiko Gaztegunea
 Basozelai Kalea 11 zk. 48970 Basauri Bizkaia
Telefonoa: (+ 94 466 64 00)
WhatsApp: (+ 634 984 615)
 zirtzart@basauri.eus
San Migeleko Gaztegunea
 Gernika 60 zk. 48970 Basauri Bizkaia
Telefonoa: (+ 94 466 64 71)
 zirtzart@basauri.eus

 Basauriko Udala TTII | Pribatutasun politika

Bilatu