<<Gorde ezazu ekainaren 3ko arratsaldea (18:00-20:00) eta etor zaitez San Migeleko frontoira gurekin Udaberri Jaia ospatzera>>

ZirtZart Basaurikook gonbidatzen zaitugu ekainaren 3an Udaberriko lehenengo jaian parte hartzera San Migeleko frontoian. Bertan giro eta musika bikainaz gozatuko dugu elkarrekin. Janaria, edaria eta jarduera bereziak ere izango dira.
Sarrera guztiz doan izango da, baina kontuz!, edukiera-muga egongo da eta.
Jaia arratsaldeko 18:00etan hasiko da eta bi ordukoa izango da. Anima zaitez, zure zain izango gara!

<<Irteera SOPUERTA ABENTURARA, ekainaren 18an, ZirtZart Basaurik antolatuta>>

Zirt Zart Basauri Gazteria zerbitzuak SOPUERTA ABENTURARA joateko irteera antolatu du, ekainaren 18an, 12 eta 30 urte bitarteko gazteentzat.

Sopuerta Abentura arbolen arteko zirkuitu parkea da. Natura inguruneaz gozatzeko modu ezin hobea da, hainbat altueratako ibilbide eskegietatik ibiliz eta hamaika zirkuitu erakargarri eginez. Bukatutakoan, parketik gertuko gune batean bazkalduko dugu elkarrekin.
Joan-etorria autobusez egingo dugu. Ordutegien aldetik, gazteek goizeko 10:30ean egon beharko dute Basauriko udaletxearen aurreko autobus geltokian, eta arratsaldeko 16:30ean itzuliko gara leku berera.
Jarduera horretarako arropa erosoa eta bazkaria eraman beharko dituzte parte-hartzaileek (ogitartekoa, tupper-a…).
Plazak mugatuak dira, eta kopurua gaindituz gero, zozketa egingo dugu parte-hartzaileak hautatzeko. Izen-emateko azken eguna ekainaren 5a izango da.

<<ZirtZart Basaurik «Uda Tekno STEAM» eta «Uda Gazte» campusak eskainiko ditu, 12 eta 16 urte bitarteko gazteentzat, 2023ko ekainaren 26tik uztailaren 7ra>>

- Uda Tekno STEAM, ekainaren 26tik 30era Arizko Dorretxean
- Uda Gazte, uztailaren 3tik 7ra Basozelai Gizarte Etxean

Basauriko Udalak, ZirtZart gazteria zerbitzuaren bitartez, 12 eta 16 urte bitarteko gazteentzako bi jarduera eskainiko ditu, ekainaren 26tik uztailaren 7ra bitartean. Hain zuzen ere, «Uda Tekno STEAM» eta «Uda Gazte» campusak izango dira.

Lehenengo campusa Arizko Dorretxean eskainiko da astelehenetik ostiralera, 10:00etatik aurrera eta egunean hiru orduko iraupena izango du. Egingo diren jardueren artean nabarmentzekoak dira Lego Mindstorms EV3ren bitartez First Lego League 2023 erronka, errealitate birtualari buruzko esperientziak eta zientzia forentsea lantzeko tailerrak. Bestalde, «Uda Gazte» campusa, Basozelai Gizarte Etxean eskainiko da, astelehenetik ostiralera, 11:00etatik aurrera eta bi orduko iraupena izango du. Bertan, kirol eta ur ginkanak, eskulanak eta abentura irteera izango dira, besteak beste.

Interesdunek maiatzaren 15etik ekainaren 15era bitartean eman dezakete izena, telematikoki, Gazteria Zerbitzuaren web orriaren bidez (zirtzart.basauri.eus) edo Basozelai Gizarte Etxean dagoen Gazteentzako Informazio Bulegoan bertan. Plaza kopurua mugatua denez, horiek esleitzerako orduan lehentasuna izango dute «ZirtZart Bazkide»ean alta emanda daudenek.

Bi eskaintzetan parte har daiteke. Tarifari dagokionez «Uda Tekno STEAM» campusean parte hartzen dutenek 40€ko kuota ordaindu beharko dute, eta «Uda Gazte» campusa aukeratzen dutenek, 25 eurokoa. ZirtZarteko bazkideek %40ko deskontua dute; Gazte Txartela dutenek, berriz, %20koa.

<<Rockeinen 11. edizioak musika talde eta bakarlari berriak bilatuko ditu Euskadin eta Nafarroan>>

-Izena emateko epea gaurtik uztailaren 11ra arte egongo da zabalik eta finala azaroaren 18an izango da Basauriko Social Antzokian

-Silitia 2022ko kategoria nagusiko talde irabazleak prentsaurrekoan aurkeztu ditu sariaren ondoriozko EPa eta bideoklipa

Basauriko Udalak, Arrigorriaga, Galdakao eta Laudioko Udalen eta Bizkaiko Foru Aldundiaren laguntzarekin, hamaikagarren urtez jarraian iragarri du Rockein musika lehiaketa, Euskal Autonomia Erkidegoko eta Nafarroako talde eta bakarlariei zuzendua.

Izena emateko epea gaurtik uztailaren 11ra arte egongo da zabalik. Jasotako proposamen guztien artean, sektoreko profesionalek osatutako epaimahai batek sei finalista aukeratuko ditu, azaroaren 18an, larunbata, Basauriko Social Antzokian arituko direnak. Gau horretan bertan, epaimahaiak 2023ko edizioko talde irabazleak zeintzuk izango diren erabaki eta jakinaraziko du.

Jokoan dauden sarien artean, bost abestiko EP baten grabazioa, ekoizpena eta masterizazioa, bideoklip baten ekoizpena eta MAZ Basauri jaialdian jotzeko aukera daude.

Silitia iazko irabazleak gaurko prentsaurrekoan aurkeztu ditu sari horren emaitzak, ‘Hiru ate’ izeneko sei abestiko EP bat eta ‘Hegan hegan / 21 min’ single bikoitzaren bideoklipa, Rockeinen sare sozialetan dagoeneko ikusgai dagoena.

Duela 11 urte Rockeinek bere ibilbidea hasi zuenean, musika-talentu berriak aurkitzeko eta sustatzeko Basaurin antolatutako aurreko lehiaketen lekukoa hartu zuen. Aurreko esperientziei hilabete batzuetako laguntza profesionala gehituz egin zuen, artistei amateurismotik sektore profesionalerako jauzia esploratzen hasten laguntzeko. MAZ Basauri zikloaren barruan ordaindutako emanaldiak gehitu ziren eta estudio profesional batean grabatzeko eta bideoklip bat sortzeko sariak, jakina.

Hamaika urte geroago, Rockein proiektu sendoa da, lau udalek parte hartzen dute (Arrigorriaga, Galdakao, Laudio eta Basauri) eta Bizkaiko Foru Aldundiaren laguntza dauka. Zazpi urte jarraian daramatza bere parte-hartzea hobetzen. 2022an 188 proposamenekin itxi zen. Berdintasuna, tokiko talentua eta euskara sustatzeko irizpideak mantentzen ditu, eta parte hartzen duten proposamenak berritzeko gaitasun nabarmena du, 2022an %25ekoa izan baitzen.

“Abiadura bizian mugitzen eta eguneratzen den mundu batean, batzuetan kosta egiten da proiektuak egonkortzea. Hala ere, denboran irauten duten horiek dira beren ekintza-eremuetan eragiteko benetako gaitasuna duten ekimenak sustatzen laguntzen dutenak. Rockein horren adibide ona da. Oso modu apalean hasi zen eta gaur egun Euskal Herri osoko artista berrientzako erreferentziazko lehiaketa da. Musikaren industria, gizartea bezala, asko aldatu da hamaika urte hauetan. Baina artistak eta abestiak sortzen jarraitzen dira ezinbestean. Rockeinek talde eta bakarlari berrien egungo beharretara egokitzen jakin du eta aurten ere parte hartzera animatzen zaituztegu”, adierazi du prentsaurrekoan Asier Iragorri Basauriko alkateak.

PARTE HARTZEKO BALDINTZAK
- Gutxienez taldeko kideetako bat Euskal Autonomia Erkidegoan edo Nafarroan jaioa izatea edo bertan bizitzea.
- Tokiko talde onenaren sarirako hautagai izateko: gutxienez taldeko kideetako bat Basaurin, Arrigorriagan, Galdakaon edo Laudion erroldatuta egotea.
-Eskarabilera Sarirako hautagai izateko: gutxienez taldeko kideen %50 emakumeak izatea.
- Taldekideek 16 urtetik gora izatea.
- Izena emateko unean ez dezatela editaturiko disko bat baino gehiago izan, disko etxe batekin kontratua eduki ala ez.
- Abestiak originalak izatea.

-Musika estilo guztiak onartzen dira.
- Aurretik Rockeinen izena eman duten talde guztiek edizio berri honetan berriz parte hartzeko aukera dute, aipaturiko baldintzak betetzen dituzten heinean. Sariren bat irabazi duten taldeek ez dute saria lortu zuten kategorian bigarrenez saridun izateko aukerarik izango.

SARIAK:

Talde irabazlea
- EP profesional bat (gutxienez bost abesti) grabatzea, ekoiztea eta masterizatzea Bilboko El Tigre estudioetan.
- EParen 500 kopia editatzea, CD euskarrian.
- Bideoklip profesional bat grabatu eta ekoiztea.
- MAZ Basauri jaialdian edo Bizkaiko areto onenetako batean kontzertua eskaintzea

Tokiko talderik onena
- MAZ Basauri jaialdian edo Bizkaiko areto onenetako batean kontzertua eskaintzea

Euskarazko talderik onena
- Abesti bat grabatzea eta ekoiztea.
- MAZ Basauri jaialdian edo Bizkaiko areto onenetako batean kontzertua eskaintzea

Eskarabilera saria
- MAZ Basauri jaialdian edo Bizkaiko areto onenetako batean kontzertua eskaintzea

OINARRIAK · IZENA EMATEKO ORRIA

<<EUSKOKLIPAK>>

EUSKOKLIPAK lehiaketa berrian parte hartzera animatuko zara?

ZirtZart Basauriko gazteria zerbitzuak, Euskara Atalarekin elkarlanean, gure bazkideentzako lehenengo bideoklip lehiaketa eskaini nahi dizue. Bi modutan parte hartu ahal izango da:

- Maiatzaren 12an San Migeleko gaztegunean eta maiatzaren 20 Basozelaiko gaztegunean antolaturiko jardueretan parte hartuz.

- Bideoklipa zure lagunekin etxean edo kalean grabatuz.

Parte hartzeko azken eguna maiatzaren 21a izango da.

Parte-hartzaileen bideoklip guztiak behin jasota, gure sare sozialetan partekatuko dugu bozketa; horrela maiatzaren 25ean zeuek aukeratuko dituzue irabazleak.

Zer egingo dugu maiatzaren 12an eta 20an?

Euskal Astea ospatuko dugu elkarrekin, maiatzaren 12an San Migelen eta 20an Basozelain. Horretarako, bi gazteguneetako lbegiraleok euskarazko abestia aukeratzeko laguntza eta bideoklipa grabatzeko jarraibideak emango dizkizuegu. Grabaziorako materialak eta mozorroak ere jarriko ditugu zuen eskura. Amaieran, askaria antolatuko dugu parte hartzaile guztientzat.

Nola grabatuko dut bideoklipa?

- Bideoan taldeko partaide guztiak agertu beharko zarete.

- Gutxienez 30 segundoko iraupena izan beharko du (ez da abesti osoa egin behar).

- Bideoklipa bertikalean grabatu beharko da. - Mugikorrarekin grabatu eta muntatu beharko da (doako app-ak erakutsiko dizkizuegu: YOUCUT, CAPCUT, POWERDIRECTOR, IMOVIE…).

Zer irabazi dezaket?

Lehen sailkatuak: Hari gabeko kaskoak taldeko partaide bakoitzarentzat.

Bigarren sailkatuak: ELKAR dendako opari txartela taldeko partaide bakoitzarentzat.

Parte har dezaket?

Lehiaketan izena emateko, baldintza hauek bete beharko dira:

1. Parte-hartzaileak ZirtZarteko bazkideak izan beharko dira. https://zirtzart.basauri.eus/index.php/eu/bazkide-txartela-eu

2. Bideokliperako osatutako taldean gutxienez 3 pertsona eta gehienez 8 agertu beharko dira.

3. Parte-hartzaile bakoitza bideo bakar batean ibiliko da.

4. Bideoklipa aurten (2023) grabatuta egon beharko da.

*Antolatzaileek proposamenak lehiaketatik kanpo utziko dituzte oinarrietako baldintzak betetzen ez badituzte.

Zelan hartu parte?

Lehiaketan parte hartu nahi dutenek eta programatutako jardueretara hurbildu ezin direnek, bideoklipa Helbide elektroniko hau spambot-etatik babestuta dago. JavaScript gaituta izan behar duzu ikusi ahal izateko. helbidera bidali beharko dute, bazkide zenbakia adieraziz.

Bideoklipak tamaina neurriak gainditzen baditu, link bat partekatu ahal izango da google Driven bidez.

Partaidetzak jaso ondoren, antolatzaileek horren berri emango diote lehiakideari, posta elektroniko bidez, eta horrela parte hartzea konfirmatuta geratuko da.

*Lehiaketatik kanpo geratuko dira bideoklipak edukiagatik edo mezuagatik, baldin eta sexu diskriminazioa bultzatu, iraingarriak izan, sentsibilitatea zauritu edo hirugarren pertsonen eskubideak bortxatzeko modukoak badira.

Nork aukeratuko ditu irabazleak? Zeuek izango zarete epaimahaia. Maiatzaren 25ean bozketa bat antolatuko dugu gure sare sozialetan (instagram eta Facebook), zuen gustuko bideoklipa bozkatzeko.

Jabetza intelektualeko eskubideak eta baimenak

Parte-hartzaileek ZirtZart Basauri gazteria zerbitzuari ematen diote baimena lehiaketa honetako irudiak zabaltzeko helburu komertzialik gabe. Lehiaketan parte hartzeak oinarri guztiak bere osotasunean onartzea dakar izena emandako kide bakoitzarentzat.

<<GAZTEGUNEETAKO MAIATZEKO PROGRAMAZIOA >>

Zirt Zart Basauri Gazteria Zerbitzukook hilabete honetan «EUSKAL HILABETEA» gaia hartuta doako jarduera batzuk eskainiko dizkiegu 12-17 urte bitarteko gazteei.

Tailerrak Basozelaiko eta San Migeleko gazteguneetan izango dira. Ez da beharrezkoa izena aurretiaz ematea, baina toki kopurua mugatua izango da. Izena eman ahala sortuko dira taldeak. Jarraian, gure egitarauaren laburpentxoa:

Euskal Hama Beads: hainbat koloretako hama beads-ak erabilita euskal irudi tipikoak sortuko ditugu.

EUSKOKLIPAK: Lehiaketa honetan, gazteak taldeka bananduko dira eta bakoitzak euskal kanta famatu baten bideoklipa sortuko du. Bideokliparen talde irabazleak sari izugarriak jasoko ditu. Anima zaitezte! (info+ https://zirtzart.basauri.eus/ ).

Gazte jarduera: gazteguneko parte-hartzaileok bilduko gara aktibitate berezi bat prestatzeko datorren hilabeteari begira.

Festibas jaialdiaren bederatzigarren edizioa maiatzaren 13an ospatuko da Maialen Ibarra, BrokenD eta Semejantes taldeen ikuskizunekin

- 18:00etatik aurrera Basauriko San Isidro plazan
- Talde lokalen jaialdia bukatutakoan Urrats Erromeria izango da oholtza gainean

Maialen Ibarra, BrokenD eta Semejantes talde basauriarrak izango dira aurtengo musika zikloan; hain zuzen ere, maiatzaren 13an Basauriko San Isidro plazan, eta auzoko jaien ospakizunekin bat eginez. Gainera, berrikuntza dugu, talde lokalen jaialdia bukatutakoan Urrats Erromeria izatea eszenatokian, gaua girotuz, 22:30etik aurrera. Kontzertu hori EUSKAL ASTEko ekitaldia da Basauriko Udalak antolatua.

«Festibas» jaialdiak helburu du herriko bandei zuzenean jotzeko aukera ematea, formatu profesionalean, eta proiektu bakoitza ikusleen aurrean sustatzea jai-giroan. Jaialdi hau ZirtZart Basaurik antolatzen du (Basauriko Udalaren gazte zerbitzua) Musika Master eta Txantxangorri Bentako Auzo Lagunak Kultur Elkartea laguntzaile dituela.

Jaialdia arratsaldeko 18:00etan hasiko da eta talde bakoitzak 45 minutu izango ditu oholtzan aritzeko.

- Maialen Ibarra: euskal pop eta pop-rockeko proiektu berria. Orain arte zuzenekoetan eskainitako proposamena aldatu eta hobetu nahian, banda formatua sortu dute. Hortaz, soinu garbia eta freskoa mantenduz banda batek dakarren indarra eta energia gehitu dizkiote.
- BrokenD: 2022an sorturiko taldea, bluesa 70eko urteetako rocka eta 90etako grungea nahastearen emaitza. Nortasun handikoa da eta ez zaitu axolagabe utziko.
- Semejantes: 2014an sorturiko taldea da. Pop, rock, indie eta alternatibo estiloen artean mugitzen da eta musika errepertorio sendoa eskaintzen du.

ZirtZart Basaurik hamar inskripzio jaso ditu zuzeneko musika jaialdian parte hartzeko, eta horien artetik aukeratu dira San Isidro plazan jotzeko taldeak.

«Musika taldeak eratzea» programaren 2022/23 ikasturteari apirilaren 28ko entzunaldiak bukaera borobila emango dio

- Basauriko Ibaigane Kultur Etxean egingo da.
- 19:30etik aurrera. Doako sarrera edukiera bete arte.

Azaroaren 3an jarri ziren abian Basauriko Udalak, ZirtZart Gazte Zerbitzuaren bitartez, urtero eskaintzen dituen musika-tresnen formakuntza ikastaroak. Bertan, bost modalitate bereizi dira: kantua, gitarra, baxua, bateria eta haize taldea. Dinamikari dagokionez, ikasleek jaso dituzten praktikak ez dira aukeratutako instrumentura mugatu, hau da, beste taldeetako parte-hartzaileekin ere jardunean aritu dira, musika taldeak sortzea sustatuz.

Sei hilabete baino gehiagoko formakuntzaren ostean, ikasturte-amaierako entzunaldia Basauriko Ibaigane Kultur Zentroan egingo da, apirilaren 28an (ostirala). Bertan, ikastaroan parte hartu izan dutenen zuzeneko emanaldiak entzun eta ikusi ahal izango dituzte ikusleek.

Emanaldia 19:30ean hasiko da, eta lantaldea osatzen duten ikasleek zuzenean joko dute. Sarrera doakoa izango da. Plaza kopurua mugatua da.

2022/2023ko ikasturtean 41 inskripzio jaso ditu erakundeak.