"UDAKO CAMPUSAK 2026"

ZirtZart Basaurik «Tekno STEAM», «Uda Gazte», «Sukalgazte Campus» eta «STEAM Artea» campusak eskainiko ditu, 12 eta 17 urte bitarteko gazteentzat, ekainaren 22tik uztailaren 24ra.

• Tekno STEAM, ekainaren 22tik 26ra
• Uda Gazte, ekainaren 29tik uztailaren 3ra
• Sukalgazte Campus (sukaldaritza), uztailaren 6tik 10era edo uztailaren 13tik 17ra
• STEAM Artea, uztailaren 20tik 24ra

Basauriko Udalak, ZirtZart Gazteria Zerbitzuaren bitartez, lau campus horiek eskainiko dizkie gazteei. Jarduerak ZirtZarten (Autonomia kalea 3) eta Arizko Dorretxean izango dira, campusaren arabera.

Ekainaren 22tik 26ra, 10:00etik 13:00era, Arizko Dorretxean, Tekno STEAM campusa egongo da. Bertan, jarduera teknologikoak egingo dituzte, eta parte-hartzaileek erronkak ebatzi beharko dituzte, robotika hezigarriaren bidez.

Ekainaren 29tik uztailaren 3ra, 11:00etatik 13:00etara, ZirtZarten, Uda Gazte campusa egingo dute: kirol eta ur ginkanak, eskulanak eta jarduera ludikoak izango dira bertan.

Sukalgazte Campusa, uztailaren 6tik 10era edo uztailaren 13tik 17ra, 11:00etik 13:00era, ZirtZarten. Sukaldaritza-campus horretan, errezetak, trikimailuak eta jarduera dibertigarriak landuko dituzte.
* Kontuan hartu: bi asteak independenteak dira eta eduki bera dute; ez dira osagarriak.

Uztailaren 20tik 24ra, 11:00etatik 13:00etara, ZirtZarten, STEAM Artea campusa izango da, non artea eta zientzia uztartzen dituzten tailerrak landuko dituzten. Horretaz gain, jozkintza landuko dute.

Interesdunek maiatzaren 4tik ekainaren 4ra bitartean eman dezakete izena, telematikoki, Gazteria Zerbitzuaren webgunearen bidez (zirtzart.basauri.eus) edo Autonomia kalean, Gazteentzako Informazio Bulegoan bertan.

Plaza-kopurua mugatua da, eta lehentasuna izango dute «ZirtZart Bazkide» txartela dutenek. Campus batean baino gehiagotan parte hartu daiteke.

Tarifei dagokienez:

• Tekno STEAM, Sukalgazte eta STEAM Artea: 43 €
• Uda Gazte: 28 €

% 40ko deskontua izango dute ZirtZarteko bazkideek, eta % 20koa Gazte Txartela dutenek.

Informazio gehiago:
Basauriko Udala – ZirtZart Basauri, Gazte Bulegoa
Tel.: 944 666 430
This email address is being protected from spambots. You need JavaScript enabled to view it.
http://zirtzart.basauri.eus/

TAILERRA: "LOS CUIDADOS QUE NOS UNEN" 

Maiatzaren 7an, arratsaldeko 18:00etan,  “El cuidado que nos une” tailerra burutuko da Zirtzart-en, 20 era 35 urte bitarteko gazteentzat zuzendua. Ana Badiola Basauriko udaleko zaintzaileen (senideen) zainduz zerbitzuaren arduradunak aurrera eramango du. Topaketa honetan zaintzak gizartean duen garrantziaz eta guztiok horietan dugun  erantzunkidetasunaren beharraz sentsibilizatu nahi da.

Bertara joan ahal izateko, beharrezkoa da izena ematea gure harremanetarako edozein kanalen bidez (telefonoa, whatsappa, posta electronikoa edota sare sozialak).

<<Izaro Barruetak irabazi du Hitz-Erdiko Kontaketak euskarazko ipuin laburren lehiaketa>>

Bederatzigarren edizio honetako irabazleak:

-Izaro Barrueta Larruskain (Muxika, 1.saria), Sara Aranburu Lasa (Ordizia, 2.saria) eta Alazne Lopez Aranberria (Ermua, 3.saria)

-Irune Etxebarria Lumbreras (Laudio, Elkar Saria) eta Jone Galindez Verano (Basauri, Basauri Saria)

«Askotan pentsatu nuen une hartan». Lehiaketako antolatzaileek esaldi hasiera hori proposatu zuten parte-hartzaileek jarraipena emateko eta gehienez ehun hitzeko kontaketa bat idazteko, euskaraz. Bederatzigarren edizioa 2026ko urtarriletik martxora egin dute, eta 192 proposamen jaso dituzte.  Lehiaketa Basauriko Udalaren ZirtZart Gazte Zerbitzuak antolatzen du, Geuria Hego Uribeko herri komunikabidearen eta Elkar Euskal Kulturgintzaren laguntzarekin.

Bost kontakizun hautatu dituzte. 1. sailkatuak, 200 euroko saria jaso du; 2. sailkatuak, 150 eurokoa; 3. sailkatuak, 100 eurokoa; «Elkar saria» jaso duenak —adingabeei zuzendua—, 150 eurokoa, eta «Basauri saria» jaso duenak —herrian erroldatutakoei zuzendua—, 150 eurokoa. Horrez gain, Hego Uribe eskualdeko Geuria aldizkarian lehen bi sailkatuen ipuinak eta Elkar eta Basauri sarituen ipuinak argitaratuko dituzte.

Azkenik, liburuxka berezia sortu dute jasotako kontaketa batzuekin, non, besteak beste, bost irabazleak dauden.  Ale-kopuru mugatua dago eskuragarri, Basauriko Gazte Informazio Bulegoan eta Elkar dendan, doan.

Hona hemen proposamen irabazleak:

1. Saria · Izaro Barrueta Larruskain (Muxika)

Askotan pentsatu nuen une hartan nola erditu eta erdibitu nintzen. Ez al zetozen bada jaiotza eta bizia elkarrekin? Antza, bizia eta heriotza ordena horretan datoz derrigorrean hala eztenean ulertezin egiten zaigu, ez gaude halako paradoxetara ohituta. Gurasoak galtzean, umezurtz bihurtzen gara, bikotea galtzean, alargun, izatear dagoen umea galtzean, ostera, ikusezin. Zaila da izenik gabe ezer irudikatzea, existitzen dela jakitea. Ustekabean heriotzak jaiotza aurreratu zuenean, errudun sentitzen nintzen nire izate osoarekin babesten saiatu nintzena galtzearen erantzule, eta gainera, entzule natura jakintsua da, hobe orain gero baino, oraindik gazteak zarete... Bitartean, hemen segitzen dugu, sabel biribilen penaz, mainarik gabeko isiltasun gorgarrian esku-hutsik.

2. Saria · Sara Aranburu Lasa (Ordizia)

Askotan pentsatu nuen une hartan dena gelditu zela. Erlojuko orratzak amen batean higitu zuen sakela. Hutsaldiak ez zion sigi-saga segi gura horrela. Medikuen mintzoa zimela, malkoetan zintzilik umela elea hitz erdiz, negarra izerdiz, ahaztuz grinaren koktela. Etxea begietsi nuen bestela. Hutsunearen tunela. Zure zapatilak ate ondoan zeuden honela, presaka erantzi izan bazenitu bezala. Ohitura fidela, etxea betetzen zenuen berehala. Berdin dago logela, ate hurrean duzu partzela. Tentazioa dut txukun jartzeko dagoena motela, amaitzeko negarra bete upela. Ez naiz erdu gure etxera. Dolua dut totela barruan galera, eskela. Pentsatu izan dut une hartan dena gelditu zela.

3. Saria Alazne Lopez Aranberria (Ermua)

Askotan pentsatu nuen une hartan gogoan nituela zure eskuak, hondarrean pausatzen ziren arrasto epelak bezala. Gogoan nuela zure urratsen doinu geldoa, ilunabarrean itsasoak hartzen duen kolorea bezain bare. Eta gogoan nituela ekaitzak ere, gure artean igaro ziren haizeak, bihotzak dardarazten zituzten olatuak. Batzuetan pentsatzen dut denborak zubi sekretuak eraikitzen dituela iraganaren eta orainaren artean. Agian horregatik itzultzen zara nire ametsetara, urruneko irla baten itzal moduan. Han, non zeruaren islak uraren azalean dardara egiten duen, itsasoak bihotza balu bezala. Eta nik gauaren ertzean pausatzen ditut nire hitz gaziak, kresalaren arnasetan. Agian olatuek eramango dituzte zure kostara, gure isiltasun zaharraren arrastoa berpiztera.

ELKAR Saria · Irune Etxebarria Lumbreras (Laudio)

Askotan pentsatu nuen une hartan, zeru oskarbi horren atzean maitasun istorio bat ezkutatzen zela ohartzean. Behin batean, ilargi bakartiak fenomeno harrigarri batekin topo egin zuen, eklipsea hain zuzen ere. Ilargia eguzkiaren argiarekin liluratu zen, eta elkar maitemindu ziren eklipseak iraun zuen denboran. Agur esateko ordua heldu zitzaienean, euri zaparrada izan zen isuritako malkoen arrastoa. Ezinezko maitasuna zen hura, eguzkia atera orduko ilargia ezkutatzen baitzen. Bakardadean bizitzera kondenatuak zeuden, eta elkarrekin egoteko desira obsesio bilakatu zen. Zoramen horrekin amaitzeko, eguzkiak bere buruaz beste egin zuen. Ilargiak hildakoen bidea seinalatzen du, hauei argia emanez. Bide horretatik, eguzkiaren arimak ilargiarekin elkartzea lortu zuen.

BASAURI Saria · Jone Galindez Verano (Basauri)

Askotan pentsatu nuen une hartan. Mandarin arbola gainezka zegoen, adarrak pisuarengandik beheraraziz, zorua kilikatzeraino. Mandarinak neguan hazten dira, baina ez negu guztietan. Hitz egiten ez genueneko negu hartan, inoiz baino laranjago zegoen gure arbola. Gure arteko lubakiak eztanda egiteko, arbolak granadak prest balitu bezala. Niri aldiz, mandarinak hartu eta zure aurpegira jaurtiz birrintzeko irudia zetorkidan burura, zure ekintzen patetikotasuna eta nire nazka irudikatuko lukeen koadro abangoardista. Baina ezingo nituzke denak hartu. Zu zinen zuhaitzean gora egiten zenuena, mandarina garratzenak niretzat hartzeko, ni ez bainintzen ausartzen. Leihotik lorategira begiratzeari utzi nion une hartan. Supermerkatura joan eta mandarina dozena bat erosi nuen. Ez zeuden batere onak, aita.

Hamargarren edizioa 2027an abian jartzea du helburu Basauriko Udalaren ZirtZart Gazte Zerbitzuak, proiektuari segida emateko, eta idazmenean interesa dutenen talentua aurkitu eta sustatzeko.

Argibide gehiago, hemen:

Basauriko Udala – ZirtZart Gazte Bulegoa

• : 944 666 430 / 634 984 615
• Helbide elektronikoa: This email address is being protected from spambots. You need JavaScript enabled to view it.

<<GAZTEGUNEKO APIRILEKO PROGRAMAZIOA>

ZirtZart Basauri Gazteria Zerbitzukook zenbait jarduera antolatu ditugu apirilerako, 12 eta 17 urte bitarteko gazteentzat. Jarduerak ZirtZarteko Gaztegunean egingo ditugu, irteera izan ezik.

Apirilak 12: ORIENTING IRTEERA URKIOLARA
Etorri gurekin Urkiolara abentura jarduera batean parte hartzera! Pisten eta iparrorratzaren erabilera ikasiko dugu mendian orientatzeko. Beharrezkoa da aurretiaz izena ematea.

Apirilak 17 eta 18: GUZTION EUSKAL ASTEA
Ostiralean larunbateko festa prestatuko dugu guztion artean. Larunbatean, zuek antolatutako jai berezi bat egingo dugu: taloak prestatuko eta jango ditugu, bingo musikal bat sortu eta aurkeztuko duzue, eta Gaztegunea zein patioa apainduko ditugu. Ez da beharrezkoa aurretiaz izena ematea.

Apirilak 25 eta 26: IRAKURKETA TXOKOA
Lagundu iezaguzu Gazteguneko irakurketa txoko berria prestatzen! Ideiak bilduko ditugu, espazioa apainduko dugu eta orri-markagailuak sortuko ditugu. Ez da beharrezkoa aurretiaz izena ematea.