Albisteak

<<ZirtZart Basaurik «Gabon Gazte» eta «Tekno STEAM» campusak eskainiko ditu 2025eko Gabonetan>>

- 12 eta 16 urte bitarteko gazteei zuzenduak

- Gabon Gazte, abenduaren 22, 23 eta 26an, goizeko ordutegian, 10:00etatik 13:00etara

- Tekno STEAM, abenduaren 29 eta 30, eta urtarrilaren 2an goizez, 10:00etatik 13:00etara

Basauriko Udalak, ZirtZart Gazteria Zerbitzuaren bitartez, 12 eta 16 urte bitarteko gazteentzako bi jarduera eskainiko ditu, abenduaren 22tik urtarrilaren 2ra bitartean: «Gabon Gazte» eta «Tekno STEAM» campusak.

Denera, sei egunetako eskaintza izango da. «Gabon Gazte» campusari dagokionez, abenduaren 22an, 23an eta 26an egingo da, Zirt Zart Gazteria Zerbitzuan, 10:00etatik hasita eta hiru orduko iraupenarekin. Kirola, ginkanak, eskulanak eta irteera bat eskainiko dituzte, besteak beste. Bestalde, «Tekno STEAM» campusa, abenduaren 29 eta 30ean, eta urtarrilaren 2an izango da, Arizko Dorretxean, 10:00etatik 13:00etara. Teknologia-jarduerak landu, eta zenbait erronka ebatzi beharko dituzte ikasleek, robotika hezitzailearen bidez.

Interesdunek azaroaren 17tik abenduaren 11ra bitartean eman ahalko dute izena, telematikoki, Gazte Zerbitzuaren webgunean (zirtzart.basauri.eus) edo Gazteentzako Informazio Bulegoan bertan. Toki-kopurua mugatua denez, «ZirtZart Bazkide» txarteladunek izango dute lehentasuna.

Bi eskaintzetan parte har daiteke. Tarifari dagokionez «Gabon Gazte» kanpusa 27 € kostatuko da, eta «Tekno STEAM» kanpusa 42 €. ZirtZarteko bazkideek %40ko deskontua dute; Gazte Txartela dutenek, berriz, %20koa.

Informazio gehiago;

Basauriko Udala – ZirtZart Basauri, Gazte Bulegoa

- 944 666 430 · 634 984 615

- This email address is being protected from spambots. You need JavaScript enabled to view it.

- http://zirtzart.basauri.eus/

<<GAZTEGUNEKO AZAROKO PROGRAMAZIOA>>

Zirt Zart Basauri Gazteria Zerbitzukook zenbait jarduera antolatu ditugu azarorako, 12 eta 17 urte bitarteko gazteentzat. Jarduerak ZirtZarteko Gaztegunean egingo ditugu eta doan izango dira.

Azaroak 8: LORE SORTAK DIY
Eskuz egindako lore-sorta apaingarriak sortuko ditugu. Eraman etxera zure lore-sorta koloretsu eta originalena!

Azaroak 14, 15 eta 16: PANTAILARIK GABEKO ASTEBURUA
Asteburu honetan pantailak alde batera uzteko erronka proposatzen dizuegu. Etorri eta gozatu beste modu batzuetan: jarduera artistiko, solasaldieta jokoen bidez. Helburua? Bideokontsolak eta pantailak alde batera uztea eta elkarrekin ondo pasatzea.

A25: #KLIK BATEN ATZEAN
Azaroaren 22 eta 23ko asteburuan sare sozialen arriskuei eta bortxakeriei buruzko jarduera bat egingo dugu, dinamika ezberdinen bidez. Sare sozialen erabilerari eta horien eraginari buruz hausnartzeko aukera izango dugu.

Azaroak 29: ZINEMA
Film bat ikusiko dugu eta amaieran komentatuko dugu... Eta, noski, palomitak egongo dira!

<<Reeler, Rockeinen 13. edizioaren sari nagusiaren irabazle>>

-Silkat Hego Uribeko talderik onena izendatu dute; Alas Glowk Bizkaia saria irabazi du; Marmitako Trap Bandak euskarazko artistarik onenari saria; eta Laztana Laztanak, Eskarabilera saria

-Finala iragan larunbatean izan zen, azaroaren 1ean, 395 gonbidapen banatu ziren eta giro oso ona izan zen Social Antzokian

Bilbon egoitza duen Reeler rock alternatiboko laukotea, Bizkaiko, Poloniako, Ingalaterrako eta Irlandako musikariek osatua, izan da Rockein talde eta bakarlarien musika-lehiaketaren 13. edizioaren sari nagusiaren irabazlea.

Iragan larunbatean, azaroaren 1ean, izandako finalean Azeituna con Huesos eta Keax taldeei gailendu zitzaion. Rockeinen sari nagusiaren aurreko irabazleak Ben Santana (2024), Lova Lois (2023), Silitia (2022), Full Cab (2021), Cecilia Payne (2020), Sara Zozaya (2019), The Owl Project (2018), Los Cosméticos (2017), Albert Cavalier (2016), Grand Matter (2015), The Weapons (2014) eta Radiofunkens (2013) izan dira.

Hego Uribeko talderik onenari saria Silkat-ek irabazi du, indie rock hirukotea, Bilbo eta Galdakaoko musikariekin eta The Cure edo Radiohead taldeen eraginekin. Bizkaiko Foru Aldundiaren Kultura, Euskara eta Kirol sailaren laguntzaz ematen den Bizkaia saria Alas Glow-rentzat izan da, pop, eletronika, R&B eta rapa bezalako generoak uztartzen dituen abeslari eta pianojole bilbotarra. Euskarazko artistarik onena Marmitako Trap Banda, urban-rap proiektua izan da; eta Laztana Laztanak, elektronika beste genero batzuekin fusionatzen dituen euskarazko proiektuak, eraman du Eskarabilera saria.

Edizio honetako epaimahai profesionala ondoko pertsonek osatu dute: Nara Pinto (Primavera Sound festibalean promotore); Jon Agirrezabalaga (El Tigre Studios-en ekoizle eta soinu-ingeniar eta musikari eta konpositore); Ibone Iza (BIME Pro-ko edukien arduraduna); Iker Bárbara (MondoSonoro musika-komunikabidearen Euskal Herriko eta Errioxako edizioaren koordinatzaile); eta Jon Zugazagoitia (Basauriko Udaleko Gazteria, Kirol eta Informatika zinegotzia).

Social Antzokiak 395 gonbidapen banatu zituen finalerako (2022an, 170; 2023an, 204; 2024an, 273) eta oso giro ona izan zen kontzertu guztietan zehar. Finala iragan larunbat gauean izan zen eta Rockeinen Youtube kanalean zuzenean emititu zen.

Parte-hartzearen bilakaera

Rockeinen parte-hartzaile kopuruaren bilakaera honakoa izan da 2013ko lehen ediziotik:

2013: 85 parte-hartzaile

2014: 105 parte-hartzaile

2015: 95 parte-hartzaile

2016: 110 parte-hartzaile

2017: 129 parte-hartzaile

2018: 135 parte-hartzaile

2019: 146 parte-hartzaile

2020: 169 parte-hartzaile

2021: 179 parte-hartzaile

2022: 188 parte-hartzaile

2023: 191 parte-hartzaile

2024: 195 parte-hartzaile

2025: 196 parte-hartzaile

Lehiaketa erreferente da Euskal Herri mailan, parte-hartze datuek, jasotako proposamenak berritzeko gaitasunak, proposamen hauen kalitateak eta parte-hartzen duten artisten gaztetasunak erakusten dutenez.

ROCKEIN 2025 SARIAK:

Kategoria nagusiko irabazlea: Reeler

-EP profesional bat (gutxienez bost abesti) grabatzea Bilboko El Tigre estudioetan

-Bideoklip profesional bat grabatzea